မယ်လမင်းပါ နို့မှုန့်ရောင်းလျှင် ထောင်ဒဏ် (၅) နှစ်

NEJ/ ၂၁ အောက်တိုဘာ ၂၀၀၈

မယ်လမင်းပါဝင်ကြောင်း ဖော်ပြထားသော နို့မှုန့်များကို ရောင်းချပါက အမျိုးသားအစားအသောက် ဥပဒေအရ ထောင် (၅) နှစ်နှင့် ဒဏ်ငွေ (၅) သောင်း ချမှတ်ခံရမည်ဟု တိုင်းကျန်းမာရေးဦးစီးရုံးမှ ပြောခွင့်ရပုဂ္ဂိုလ်က ပြောသည်။

“တရုတ်နိုင်ငံမှာ မယ်လမင်းပါတဲ့ နို့မှုန့်တွေကို သောက်မိလို့ အပြစ်မဲ့ကလေးတွေ သေတာရှိတယ်။ ဆေးရုံရောက်တဲ့အထိ ဖြစ်တယ်။ ကျနော်တို့ဆီမှာတော့ မရှိသေးပါဘူး၊ ဒါပေမယ့် မဖြစ်ဖို့တားတာ” ဟု ၎င်းက ခေတ်ပြိုင်သို့ ပြောသည်။

တရုတ်နိုင်ငံထုတ် နို့မှုန့်များတွင် မယ်လမင်းပါဝင်သည့်အတွက်
မြန်မာနိုင်ငံကျန်းမာရေးဝန်ကြီးဌာန၊ ဗဟိုအစားအသောက်နှင့် ဆေးဝါးများကြီးကြပ်ကွပ်ကဲရေးဌာန (FDA) က နို့မှုန့်များကို စစ်ဆေးခဲ့ရာ နို့မှုန့် (၁၆) မျိုးတွင် မယ်လမင်းပါဝင်သည်ကို နိုင်ငံပိုင်သတင်းစာများတွင် ဖော်ပြသည်။

ယခုအခါ ရန်ကုန်ရှိ စီတီးမတ်၊ စိန်ဂေဟာနှင့် နာမည်ကြီး စူပါမားကက်များ၊ ရှော့ပင်းမောလ်များတွင် မယ်လမင်းပါဝင်သည်ဟု ကြော်ငြာထားသော အဆိုပါ နို့မှုန့် (၁၆) မျိုးထဲမှ ၀ယ်ယူထားသူများအတွက် ငွေပြန်အမ်းပေးလျက်ရှိကြောင်း ရန်ကုန်မြို့ခံများက ပြောသည်။

စီတီးမတ် အရောင်းဝန်ထမ်းတဦးက “ဟုတ်ပါတယ်၊ ကျနော်တို့ဆီက ၀ယ်ထားတဲ့ နို့မှုန့်တွေထဲမှာ အစိုးရက ကြော်ငြာကန့်သတ်ထားတဲ့ မယ်လမင်းပါဝင်တဲ့ နို့မှုန့်အမယ်တွေ ၀ယ်ထားတဲ့သူတွေ လာပြီးငွေပြန်ယူနိုင်ပါတယ်” ဟု ပြောသည်။

အစိုးရက မယ်လမင်းပါဝင်သော နို့မှုန့်များကို အများပြည်သူသို့ တရားဝင်ကြော်ငြာသော်လည်း FDA မှ စစ်ဆေးပြီးသည့် မယ်လမင်းမပါဝင်သော နို့မှုန့်များကို မယ်လမင်းမပါဝင်ကြောင်း၊ စိတ်ချစွာသုံးစွဲနိုင်ကြောင်း မကြော်ငြာသည့်အတွက် နို့မှုန့်တင်သွင်းသော ကုမ္ပဏီများက ယင်းသို့ ဘေးကင်းကြောင်း ကြော်ငြာပေးရန် လိုလားနေကြသည်ဟု သိရသည်။

ပြည်တွင်းထုတ်ဂျာနယ်များတွင် မယ်လမင်းမပါဝင်ကြောင်း FDA ၏စစ်ဆေးပြီးစီးမှုအရ ကုမ္ပဏီများဘက်မှ တရားဝင်ကြော်ငြာလာသော နို့မှုန့်များမှာ PEP (နယူးဇီလန်နိုင်ငံထုတ်) နှင့် United Pharma မှတင်သွင်းသော ( Mylac Excel ၊ Hi- Nulac Excel ၊ Bright Junior2 + ) တို့ဖြစ်ကြောင်း သိရသည်။